كيف تعرف اهل الاحساء

كيف تعرف الحساوي

1- إذا صلى الفرض وانتهى من صلاته .. وانتهى من التسبيح التفت على اللي في يمينه وسلم عليهم والتفت على اللي في شماله وسلم عليهم
2- إذا شافك وقابلك في الطريق سلم عليك سواءً كان يعرفك أو ما يعرفك
3- إذا جاورته ما لقيت من وراه أذيه .. يعني ارقد وآمن
4- تلاقيه بسيط .. طبيعي .. سموح .. وسيع صدر .. وعلى نياته
5- إذا طق عليك الباب عطاك سله فيها رطب خلاص أو غرّ .. وإذا جاء وقت الصرام ما نساك من التمر الزين
6- تلاقيه غارس في بيته فسيله وتشوفه مهتم فيها بنفسه
7- تلاقي عنده سيارتين .. الأولى كابرس يروح عليها الشغل .. والثانيه سوبر حق طريق مكة
8- تلاقي طموح أبناءه إذا تخرجوا من الجامعه إنهم إما يصيرون مدرسين في الحكومه أو مهندسين في شركة أرامكو .. وأزيدك من الشعر بيت .. كل واحد منهم يبي يتزوج مدرسه ويسكن في شقه لحاله
9- اجتماعي من الطراز الاول .. يعني ما تمل من سوالفه
10- يزعل لكن قلبه أبيض بسرعه ينسى وعلشان كذا ما تلاقيه حقود .. وإذا كان حقود يعنى شاذ عن القاعده
11- إذا شاف شيء غريب أول مره يشوفه أو يسمع فيه .. قال: الله ..
12- إذا قلت له: على كيفك .. رد عليك وقال: ما يحصل
13- إذا جاء شهر رمضان طق عليك الباب وعطاك صحن هريس من طبخ أم عياله وتلاقيها متنغصته حق زوجتك
14- إذا طلع تقاعد .. تلاقي طموحه عماره في الخبر أو الدمام .. ومزرعه في الحسا فيها بركة سباحه .. وتنور حق المندي
15- يخاف من العين .. علشان كذا تلاقيه يقول لك .. قول ما شاء الله
16- اذا كان ساكن في الدمام ، الخبر ، الظهران ، الجبيل أو أي مدينه أخرى، وجاء يوم الاربعاء حرك ونزل الحسا .. وفوق كذا يحب يقضي العيد عند أهله وجماعته هناك..
17- ما ينساك في العزايم والمناسبات .. يعرف الأصول وكريم
18- إذا شميت ريحة المشموم " الريحان " في بيتك اعرف ان زوجته كانت تزور زوجتك
19- يستانس وينبسط لما يشوف ناس من أهل الحسا ..
20- يحب يقرأ اللي ينكتب عن الحساويه .. وعلشان كذا قرأ كل الكلام اللى أنا كتبته من 1 الى 20 ..